從雪山到 100K — Run Crew Jennifer 的越野跑故事
由大學時為減肥開始跑步，到後來因為 Patagonia 一場暴風雪而認真面對體能訓練，Jennifer 一路由行山、越野跑，跑到而家已經完成 12 場 100 公里賽事。對佢嚟講，跑步有自我對話嘅一面，亦都有同朋友同社群連結嘅一面。
提到俾新手嘅建議，Jennifer 提到：「享受係最緊要的，享受喺山上的訓練過程，享受山上自由自在的感覺，享受比賽的失敗與過程。」
Jennifer 嘅故事其實幾有趣，唔講太多，大家可以喺下面睇完整嘅訪問內容。
你幾時開始跑步？
大學時候因為想減肥，買左第一對跑鞋，落街圍住屋企跑幾個圈已經想死。
大約十年前，鐘意左行山，特別係高海拔嘅雪山，有一次喺 Patagonia 遇上暴風雪，伸手不見五指，行三步跌一步，體力幾乎秏盡，腦裡出現是否需要求救，才驚覺救援隊係需要一日嘅時間才可以抵達，喺大風雪中更加喺唔洗諗會有救緩直升機。嗰次，一返到地平面，一邊嗌住以後唔再爬雪山，亦一邊諗著喺雪山上面，可以救自己嘅大概就只有自己。由嗰陣起我就的起心肝想藉住跑步提升自己嘅體能與耐力。
跑步嘅意義
跑步對我黎講，好 I 的一面係一個自我對話的過程，是一個享受自己空間的時刻，可以有好多天馬行空的想法走過腦海。 而好 E 的一面係，跑步同時係一個同朋友同社區連結的過程，係朋友間的連結，可以識到好多唔同背景同年紀的新朋友。
第一次參加 100 公里比賽嘅經驗？
第一次係行樂施毅行者。無太多的準備，甚至連齊腳練習都未試過就膽粗粗上路，記得個次我地行左42小時，係路邊打邊爐，係路邊訓覺，腳板底痛膝頭痛樣樣齊。
到現時為止，你跑過幾多個100公里比賽？
原來唔覺唔覺已經玩左12個100公里。
- 2015 樂施毅行者
- 2016 樂施毅行者
- 2016 HK100
- 2018 UTMB-CCC
- 2019 環大帽山越野跑 - 荃打火
- 2019 逆走100
- 2019 Trans Jeju 100
- 2023 樂施毅行者
- 2024 樂施毅行者
- 2024 The North Face 100
- 2025 墾丁XTrail 100
- 2026 HK100
你覺得 100公里賽事最大嘅挑戰係？
我覺得最大的挑戰有3樣﹕
- 傷患管理：100公里唔多唔少會有新傷舊患，透過肌力訓練在賽前準備好，可以無傷無痛咁完成100公里永遠係一個好大的課題。由初期100 K每次都痛住咁完成，到今年場HK100 可以無傷無痛，我覺得係完成咗一個挑戰。
- 半夜眼訓：我以前每場100 都會好眼訓，甚至已經練成一路行一路訓，見到幻覺都習以為常。但近年的100 公里無再出現依個情況，原來夠專注同體力夠的情況下，係可以克服。
- 心理質素：比賽一定會俾其他人的pacing 帶住走，點樣係其他跑手介過依然保持自己pacing，keep 住唔爆，仲有半夜三更一個人係山路，加埋眼訓， 時間唔合預期，點樣唔放棄保持正面嘅心理質素去到終點都係好好玩的挑戰。
最難忘嘅比賽
對我黎講，每一場100 都有佢獨有既意義，好難講邊場先係最難忘。
綜合黎講，我覺得係山上面見到的幻覺係最難忘。試過見到著住啡色衫既女人，行近原來係棵樹，試過聽到山邊好熱鬧以為到Checkpoint，原來只係空地一塊，見過身高3米隻手好長的人係度揮手，甚至見過半透明的小朋友係路邊同我say hi ，而我當時的反應係好眼訓面無表情咁hi 返轉頭…
點解開始着 ALTRA 鞋？
由細到大都有拇趾外翻同扁平足的問題，之前玩長途山賽都會出現腳指公同腳板底痛的情況，痛到要係鞋面噴止痛噴霧，試過度身訂造鞋墊，同時亦都係2023 年接觸到赤足鞋。由於 ALTRA 的鞋係闊腳掌、Zero Drop，加上有一定厚度，適合長途比賽，所以就嘗試 ALTRA 的跑鞋。
數數下原來已經著左22對 ALTRA…
| 類別 | 鞋款 | 數量 |
|---|---|---|
| 路鞋 | Vanish Tempo | 3 |
| 路鞋 | Vanish Carbon | 1 |
| 路鞋 | Torin 6 | 2 |
| 路鞋 | Torin 7 | 1 |
| 路鞋 | Experience Flow | 1 |
| 路鞋 | Escalante Racer | 2 |
| 路鞋 | Escalante 2.0 | 2 |
| 山鞋 | Olympus 5 | 2 |
| 山鞋 | Mont Blanc | 3 |
| 山鞋 | Mont Blanc Carbon | 1 |
| 山鞋 | Timp 5 Boa | 1 |
| 山鞋 | Timp 5 | 2 |
| 山鞋 | Lone Peak | 1 |
著咗幾年之後你覺得有咩分別？
著左Altra 之後，配合埋做多左strength & condition, 同埋增加返腳指公既mobility 之後，我一直以黎長途賽困擾住我由拇趾外翻導致既腳指公痛，就算行100公里都無再出現，而膝頭哥既穩定度亦都係提升左。
你最鍾意嘅 ALTRA 鞋！
由25K，50K 到 100K 比賽同練習都係鐘意著 Timp 5 鞋上山！
如果路跑 Easy Run 就鐘意著 Experience Flow！
點解你鍾意 Timp 5 多過 Olympus、Lone Peak？
對於我黎講，Timp5 既厚薄岩岩好係 Olympus 同Lone Peak 之間！比賽黎講，佢有路鞋既感覺，而鞋底亦都唔單止夠香港既山路用，就算係外國一啲技術路段都無問題！
而 Lone Peak，我比較鐘意喺輕鬆郊遊既時候著，薄鞋底可以乘機訓練埋個腳板底既小肌肉。
而 Olympus，我會出街或者返工時候著，因為易襯衫！而比賽黎講，由於香港始終都係多石屎路，佢相對路跑嘅腳感無 Timp5 咁爽。
我會建議一開始試用 ALTRA 鞋嘅人可以先著ALTRA Low drop 鞋，因為都市人著既鞋一般都有drop ，所以岩岩開始著 Zero Drop，需要俾隻腳由短途開始適應。所以由 ALTRA Low Drop 嘅鞋開始著起會更好。同埋唔好比賽前先轉用 Zero Drop 鞋，要喺練習時就著住 Zero Drop 訓練埋肌肉。
2026年嘅比賽計劃？
暫時有4月尾係日本的 Mt.FUJI - KAI 70K！
最後對於越野跑新手，你會俾嘅建議係？
我認為享受係最緊要的，享受喺山上的訓練過程，享受山上自由自在的感覺，享受比賽的失敗與過程。另外，除左跑量之外，我覺得肌力訓練都係遠離傷患不可或缺的。
